ഇന്ത്യൻ മഹാസമുദ്ര മേഖലയിലെ ചക്രവർത്തിയായി വളരുന്ന തിരുവനന്തപുരം

ട്രിവാൻഡ്രം 👌

തിരുവനന്തപുരം:

ഇന്ത്യൻ മഹാസമുദ്ര മേഖലയിലെ സാമ്പത്തിക–തന്ത്രപ്രാധാന്യമുള്ള നഗരമായി തിരുവനന്തപുരം ക്രമാതീതമായി മാറിക്കൊണ്ടിരിക്കുകയാണ്. വിഴിഞ്ഞം അന്താരാഷ്ട്ര തുറമുഖത്തിന്റെ പ്രവർത്തന വിജയം, ശക്തമായ വ്യോമ ബന്ധം, ബഹിരാകാശ പ്രതിരോധ ഗവേഷണ രംഗത്തെ മുൻതൂക്കം, ഉയർന്ന നിലവാരത്തിലുള്ള ഐടി–ആർ&ഡി അടിസ്ഥാന സൗകര്യങ്ങൾ എന്നിവ ചേർന്നതോടെ തിരുവനന്തപുരം ഇന്ന് ഇന്ത്യയുടെ സമുദ്ര–സാങ്കേതിക തന്ത്രത്തിലെ നിർണായക കേന്ദ്രമായി ഉയർന്നിട്ടുണ്ട്.

ലോകത്തിലെ ഏറ്റവും തിരക്കേറിയ കിഴക്ക്–പടിഞ്ഞാറ് കടൽവ്യാപാര പാതയ്ക്ക് സമീപമുള്ള വിഴിഞ്ഞം അന്താരാഷ്ട്ര തുറമുഖം, ഇന്ത്യയുടെ ആദ്യ ആഴക്കടൽ ട്രാൻഷിപ്മെന്റ് തുറമുഖമെന്ന നിലയിൽ, ആഗോള ഷിപ്പിംഗ് രംഗത്ത് ഇന്ത്യയുടെ ആശ്രയത്വം കുറയ്ക്കുന്ന നിർണായക പദ്ധതിയായി മാറുകയാണ്. സ്വാഭാവിക ആഴവും, കുറഞ്ഞ ഡ്രഡ്ജിംഗ് ആവശ്യമുമുള്ള ഈ തുറമുഖം ഇതിനകം തന്നെ വാണിജ്യപ്രാധാന്യം തെളിയിച്ചിട്ടുണ്ട്.

അന്താരാഷ്ട്ര വിമാനത്താവളം, മിഡിൽ ഈസ്റ്റ്–ആഫ്രിക്ക–ദക്ഷിണേഷ്യ മേഖലകളെ ബന്ധിപ്പിക്കുന്ന ഒരു പ്രധാന എയർ ഗേറ്റ്വേയായി ട്രിവാൻഡ്രം എയർപോർട്ട് പ്രവർത്തിക്കുന്നു. ഇതോടൊപ്പം, നഗര ഗതാഗത സംവിധാനത്തെ നവീകരിക്കുന്ന മെട്രോ പദ്ധതി വ്യവസായ വികസനത്തിനും തൊഴിൽ സൃഷ്ടിക്കും പുതിയ ഊർജം നൽകുമെന്ന് വിലയിരുത്തപ്പെടുന്നു.

ഇന്ത്യയുടെ ബഹിരാകാശ ഗവേഷണത്തിന്റെ തലസ്ഥാനമെന്ന വിശേഷണം നേടിയ തിരുവനന്തപുരം, ISRO, VSSC, LPSC, IIST, നിർമാണം നടക്കുന്ന സ്പേസ് പാർക്ക്‌ എന്നിവയുടെ സാന്നിധ്യം മൂലം രാജ്യത്തിന്റെ ശാസ്ത്ര–സാങ്കേതിക മുന്നേറ്റത്തിൽ നിർണായക പങ്ക് വഹിക്കുന്നു. ബ്രഹ്മോസ്, മറ്റു അനവധി പ്രതിരോധ സ്ഥാപനങ്ങൾ ഒക്കെ നഗരത്തിന്റെ സ്ട്രേറ്റേജിക് മൂല്യം കൂട്ടുന്നു.

ഐടി മേഖലയിലും തിരുവനന്തപുരം ശക്തമായ സാന്നിധ്യം ഉറപ്പിച്ചിട്ടുണ്ട്. Tier 2 നഗരങ്ങളിൽ രാജ്യത്ത് ഐറ്റിയിൽ ആദ്യ സ്ഥാനങ്ങളിൽ തന്നെ തിരുവനന്തപുരം ഉണ്ട്. ടെക്നോപാർക്ക് കേന്ദ്രമായി സ്റ്റാർട്ടപ്പുകൾ, ആർട്ടിഫിഷ്യൽ ഇന്റലിജൻസ്, റോബോട്ടിക്സ്, ഡീപ് ടെക് ആർ&ഡി തുടങ്ങിയ മേഖലകളിൽ വേഗത്തിലുള്ള വളർച്ചയാണ് രേഖപ്പെടുത്തുന്നത്. കൂടാതെ കിൻഫ്രാ ഐറ്റി പാർക്, മറ്റു സ്വകാര്യ പാർക്കുകൾ ഒകെ ഉണ്ട്. അതോടൊപ്പം, ലൈഫ് സയൻസ്, ബയോടെക്നോളജി മേഖലകളിൽ രാജീവ് ഗാന്ധി സെന്റർ ഫോർ ബയോടെക്നോളജി ഉൾപ്പെടെയുള്ള സ്ഥാപനങ്ങൾ നഗരത്തെ ആരോഗ്യ–ഗവേഷണ ഹബ്ബായി ഉയർത്തുന്നു. ലൈഫ് സയൻസ് പാർക്ക്‌, മെഡ് പാർക്ക്‌, genome സിറ്റി എന്നിവ നഗരത്തിന്റെ ഗ്രാഫ് കുത്തനെ കൂട്ടും.

ഉന്നത വിദ്യാഭ്യാസ സ്ഥാപനങ്ങൾ സൃഷ്ടിക്കുന്ന പ്രതിഭാസമ്പത്ത്, ശക്തമായ അടിസ്ഥാന സൗകര്യങ്ങൾ, കടൽ–വ്യോമ–ബഹിരാകാശ ബന്ധങ്ങളുടെ സമന്വയം എന്നിവയാണ് തിരുവനന്തപുരം നഗരത്തെ ഇന്ത്യൻ മഹാസമുദ്ര മേഖലയിലെ ഒരു സമ്പൂർണ ശക്തികേന്ദ്രമാക്കുന്നത്.

സാമ്പത്തിക വിദഗ്ധരുടെ വിലയിരുത്തലിൽ, കടലിൽ രാജ്യത്തിന്റെ വ്യാപാര കവാടമായും, ആകാശത്ത് ഗവേഷണ–ഗതാഗത കേന്ദ്രമായും, ഭൂമിയിൽ അറിവ് സമ്പദ്‌വ്യവസ്ഥയുടെ നാഡീകേന്ദ്രമായും പ്രവർത്തിക്കുന്ന തിരുവനന്തപുരം, അടുത്ത ദശകത്തിൽ ‘ഇന്ത്യൻ മഹാസമുദ്രത്തിന്റെ സാമ്രാട്’ എന്ന വിശേഷണത്തിന് യാഥാർത്ഥ്യമായ അർത്ഥം നൽകുന്ന നഗരമായി മാറും.